പ്ലസ് ടു കഴിഞ്ഞു; ഇനി വേണ്ടത് വെറുമൊരു ഡിഗ്രിയല്ല, ‘ഫ്യൂച്ചർ പ്രൂഫ്’ കരിയർ!

പ്ലസ് ടു ഫലം വരുമ്പോൾ എല്ലാവരും ചോദിക്കുന്ന ഒരു ചോദ്യമുണ്ട്- “ഇനി എങ്ങോട്ട്?”. എൻജിനീയറിങ്ങും മെഡിക്കലും ബി.കോമും ഒക്കെ നല്ല ഓപ്ഷനുകൾ തന്നെ. പക്ഷേ, ലോകം മാറുകയാണ്. ആർട്ടിഫിഷ്യൽ ഇന്റലിജൻസും (AI) മാറുന്ന സാമ്പത്തിക ക്രമങ്ങമുള്ള ഈ കാലത്ത്, നിങ്ങളുടെ താല്പര്യത്തിനൊപ്പം ‘ഭാവി’ കൂടി മുൻകൂട്ടി കണ്ട് കോഴ്സുകൾ തിരഞ്ഞെടുക്കുന്നതാണ് ബുദ്ധി.

സയൻസ്: ലാബിന് പുറത്തെ ലോകം

മെഡിക്കൽ, എൻജിനീയറിങ് മോഹങ്ങൾക്കപ്പുറം ഇന്ന് വിപുലമായ സാധ്യതകൾ സയൻസ് നൽകുന്നുണ്ട്.

ജനറ്റിക്സ് & ബയോ ഇൻഫോർമാറ്റിക്സ്: കേവലം ചികിത്സയ്ക്കപ്പുറം ഡിഎൻഎ തലത്തിൽ രോഗങ്ങളെ പ്രതിരോധിക്കുന്ന ഈ മേഖലയ്ക്ക് ആഗോളതലത്തിൽ വലിയ ഡിമാൻഡുണ്ട്.

ഡാറ്റ സയൻസ് & ആർട്ടിഫിഷ്യൽ ഇന്റലിജൻസ്: ബി.ടെക് എടുക്കുമ്പോൾ തന്നെ കോർ മേഖലകൾക്കൊപ്പം മെഷീൻ ലേണിംഗ്, സൈബർ സെക്യൂരിറ്റി തുടങ്ങിയ സ്പെഷ്യലൈസേഷനുകൾ ശ്രദ്ധിക്കുക.

റീഹാബിലിറ്റേഷൻ സയൻസ്: ഫിസിയോതെറാപ്പിക്ക് പുറമെ ഒക്യുപ്പേഷണൽ തെറാപ്പി, സ്പീച്ച് തെറാപ്പി എന്നിവയിൽ പ്രൊഫഷണലുകളുടെ വലിയ കുറവുണ്ട്.

കൊമേഴ്സ്: കണക്കുകൾക്കപ്പുറത്തെ തന്ത്രങ്ങൾ 

അക്കൗണ്ടിംഗിനൊപ്പം ടെക്നോളജി കൂടി ചേരുന്നതാണ് പുതിയ രീതി.

ഫിൻടെക് (FinTech): ഫിനാൻസും ടെക്നോളജിയും ചേരുന്ന ഈ മേഖല പേയ്‌മെന്റ് ആപ്പുകളുടെയും ഡിജിറ്റൽ ബാങ്കിംഗിന്റെയും കാലത്ത് മികച്ച കരിയർ വാഗ്ദാനം ചെയ്യുന്നു.

ആക്ച്വറിയൽ സയൻസ്: മാത്തമാറ്റിക്സിലും സ്റ്റാറ്റിസ്റ്റിക്സിലും താല്പര്യമുള്ളവർക്ക് ഇൻഷുറൻസ്, റിസ്ക് മാനേജ്‌മെന്റ് മേഖലകളിൽ ലക്ഷങ്ങൾ ശമ്പളം നേടാവുന്ന മേഖലയാണിത്.

ഗ്ലോബൽ മാനേജ്‌മെന്റ്: വെറും ബിബിഎയ്ക്ക് പകരം ലോജിസ്റ്റിക്സ്, സപ്ലൈ ചെയിൻ മാനേജ്‌മെന്റ് അല്ലെങ്കിൽ ഡാറ്റ അനലിറ്റിക്സ് എന്നിവയിൽ സ്പെഷ്യലൈസ് ചെയ്യാം.

ഹ്യുമാനിറ്റീസ്: ക്രിയേറ്റീവ് ഇക്കോണമി

ഭാവിയിൽ എഐക്ക് പകരം വയ്ക്കാൻ കഴിയാത്തത് മനുഷ്യന്റെ ചിന്തകളെയും സർഗ്ഗാത്മകതയെയുമാണ്.

ലിബറൽ ആർട്സ്: ഇഷ്ടമുള്ള വിഷയങ്ങൾ (ഉദാഹരണത്തിന് സൈക്കോളജിയും മ്യൂസിക്കും അല്ലെങ്കിൽ എക്കണോമിക്സും ഡിസൈനും) കൂട്ടിയിണക്കി പഠിക്കാനുള്ള അവസരം ഇത് നൽകുന്നു.

യുഐ/യുഎക്സ് ഡിസൈൻ (UI/UX): ആപ്പുകളും വെബ്‌സൈറ്റുകളും എങ്ങനെ എളുപ്പത്തിൽ ഉപയോഗിക്കാം എന്ന് ഡിസൈൻ ചെയ്യുന്ന മേഖലയാണിത്. ഡിസൈനിംഗിലും ഹ്യൂമൻ ബിഹേവിയറിലും താല്പര്യമുള്ളവർക്ക് അനുയോജ്യം.

ഡിജിറ്റൽ ഹ്യൂമാനിറ്റീസ്: ചരിത്രവും സാഹിത്യവും പഠിക്കാൻ ഡിജിറ്റൽ ടൂളുകൾ ഉപയോഗിക്കുന്ന പുത്തൻ പഠനശാഖ. പിന്നെ, എഐ ടൂളുകള്‍ വികസിപ്പിച്ചെടുക്കാനുള്ള ലാംഗ്വേജ് ട്രെയിനിങ്ങിനും വലിയ സാധ്യതയുണ്ട്.

തൊഴിലധിഷ്ഠിതം: വേഗത്തിൽ ജോലിയിലേക്ക്

ഡിഗ്രിക്ക് നാല് വർഷം കാത്തിരിക്കാൻ വയ്യെങ്കിൽ ഉടൻ ജോലി ഉറപ്പാക്കുന്ന ഷോർട്ട് ടേം കോഴ്സുകളും തിരഞ്ഞെടുക്കാവുന്നതാണ്. ഉദാഹരണത്തിന്,

ഫുൾ സ്റ്റാക്ക് ഡെവലപ്‌മെന്റ്: ഐടി കമ്പനികൾക്ക് ഇന്ന് വേണ്ടത് കോഡിംഗിൽ പ്രായോഗിക പരിജ്ഞാനമുള്ളവരെയാണ്.

ഡിജിറ്റൽ പ്രൊഡക്ഷൻ: വീഡിയോ എഡിറ്റിംഗ്, മോഷൻ ഗ്രാഫിക്സ്, പോഡ്‌കാസ്റ്റ് പ്രൊഡക്ഷൻ– കണ്ടന്റ് ക്രിയേറ്റർമാരുടെ ഈ കാലത്ത് ഇതിലും വലിയ സാധ്യതകൾ വേറെയില്ല.

ട്രെൻഡ് നോക്കിയല്ല, നിങ്ങളുടെ ‘സ്‌കിൽ’ നോക്കി വേണം കോഴ്സ് തിരഞ്ഞെടുക്കാൻ. ഒരു ഡിഗ്രി നേടുന്നതിനൊപ്പം തന്നെ ഓൺലൈൻ കോഴ്സുകളിലൂടെ പുതിയ സ്കില്ലുകൾ പഠിക്കാനും (Up-skilling)സമയം കണ്ടെത്തുക.