ശരീരത്തിൽ ആഭരണമിടാൻ ഇനി സ്ഥലമുണ്ടോ? എന്തോരം സ്റ്റൈലുകളാ….

ചെറുപ്പത്തിൽ കാത് കുത്തും, കുറച്ചുകൂടെ വലുതായാൽ മൂക്ക് കൂത്തും. ഒന്നുകിൽ സ്വർണ്ണമോ വെള്ളിയോ അല്ലേൽ ഡയമണ്ടോ ആണ് കുത്തിക്കഴിഞ്ഞാൽ ഇടാനായി ഉപയോഗിക്കുന്നത്. എന്നാൽ ഈ ട്രെൻഡ് മാറിയതായി തോന്നിയിട്ടുണ്ടോ? അതായത് ഇത്കൂടാതെ വേറെ ശരീരഭാഗങ്ങളിലും ആളുകൾ ആഭരണം ധരിക്കാൻ തുടങ്ങിയോ എന്ന്?

സാധാരമയായുള്ള കാതുകുത്തും മൂക്ക് കുത്തും അവിടെ തന്നെയുണ്ട്. എന്നാൽ അതിന്റെകൂടെ വേറെയും സ്റ്റൈലുകൾ വന്നു. പുരികത്തിന്, ചുണ്ടിന്, താടിക്ക്, വയറിന്, പൊക്കിൾ അങ്ങനെ ശരീരത്തിന്റെ വിവിധ ഭാഗങ്ങളിൽ. ഇവിടെയൊക്കെ ആഭരണങ്ങളും അണിയും. കാലം പോയൊരു പോക്കേ…
ഇങ്ങനെ ശരീരത്തിന്റെ പല ഭാഗങ്ങളിൽ ആഭരണങ്ങൾ അണിയുന്നതിനെയാണ് ബോഡി ജ്വല്ലറി എന്നു പറയുന്നത്. അതിൽ ചിലത് പരിചയപ്പെടാം.

ചെസ്റ്റ് ചെയിൻ / ബോഡി ചെയിൻ / ബ്രാ ചെയിൻ

‘ചെസ്റ്റ് ചെയിൻ’ എന്നത് നെഞ്ചിനും വയറിനും കുറുകെ അണിയുന്ന ഒരു തരം ആഭരണമാണ്. പലപ്പോഴും ആകർഷക ഡിസൈനിലുള്ള ഒന്നിലധികം ലെയേസോ ലോക്കറ്റുകളോ ഇതിൽ ഉണ്ടാകാറുണ്ട്. ഉത്സവം, പാർട്ടി തുടങ്ങി സാധാരണ വസ്ത്രങ്ങൾക്കൊപ്പം അണിയാവുന്ന ഇത് ഒരു അലങ്കാര കവചം പോലെയോ അല്ലെങ്കിൽ നീളമുള്ള മാല പോലെയോ ആണ് ഉണ്ടാവുക. സാധാരണ വസ്ത്രങ്ങൾക്ക് മുകളിലോ നീന്തൽ വസ്ത്രങ്ങൾക്കൊപ്പമോ ഇത് ധരിക്കാറുണ്ട്. വളരെ നേർത്ത ഇഴകൾ മുതൽ കല്ലുകൾ പതിപ്പിച്ച ആഡംബര ഡിസൈനുകൾ വരെ ഇതിൽ ലഭ്യമാണ്. ഇവ കഴുത്തിന് ചുറ്റും അരക്കെട്ടിന് ചുറ്റുമായി ബന്ധിപ്പിച്ചോ അല്ലെങ്കിൽ ശരീരത്തിന് കുറുകെ പാറ്റണുകളാക്കിയോ ധരിക്കാൻ സാധിക്കും.

വെയ്സ്റ്റ് ചെയിൻ – ബെല്ലി ചെയിൻ,കമർബാൻഡ് എന്നൊക്കെ അറിയപ്പെടുന്ന വെയ്സ്റ്റ് ചെയിൻ അരക്കെട്ടിന് ചുറ്റും അണിയുന്ന ഒരു അലങ്കാര ആഭരണമാണ്. അരഞ്ഞാണം എന്നാണ് മലയാളത്തിൽ പൊതുവേ പറയുന്നത്. പക്ഷേ കാലം മാറുന്നതിനനുസരിച്ച് അതിന്റെ സ്വഭാവവും മാറുന്നെന്ന് മാത്രം. പുരാതന ഇന്ത്യ, ഈജിപ്ത്, പശ്ചിമ ആഫ്രിക്ക തുടങ്ങിയ സംസ്കാരങ്ങളിൽ നൂറ്റാണ്ടുകളായി ഇത് പ്രചാരത്തിലുണ്ട്. ഇത് സ്ത്രീത്വം, ഐശ്വര്യം തുടങ്ങിയ ചില അർഥങ്ങളൊക്കെ ഉണ്ടിതിന്.

ഇന്ന്, വസ്ത്രങ്ങൾക്ക് കൂടുതൽ ഭംഗി നൽകുന്ന ഒരു ആധുനിക ഫാഷൻ ആക്സസറിയായി ഇത് മാറിയിരിക്കുന്നു. സാരികൾ, പാവാടകൾ, മറ്റ് മോഡേൺ വസ്ത്രങ്ങൾ, നീന്തൽ വസ്ത്രങ്ങൾ (bikinis) എന്നിവയ്‌ക്കൊപ്പം ഇത് ധരിക്കാറുണ്ട്. വളരെ ലളിതമായ മെറ്റൽ ചെയിനുകൾ മുതൽ മുത്തുകളും കല്ലുകളും പതിപ്പിച്ച ഡിസൈനുകൾ വരെ ഇതിൽ ലഭ്യമാണ്. ഇതിൽ തന്നെ പലതരം കാറ്റഗറികൾ വരുന്നുണ്ട്.

തൈസ് ചെയിന്‍

കൈവളകളോ പാദസരങ്ങളോ പോലെ കാലിന്റെ തുടയിൽ അണിയുന്ന സ്റ്റൈലിഷ് ആയ ഒരു ആഭരണമാണിത്. ഇതിൽ പലപ്പോഴും ഒന്നിലധികം ലെയറുകളുള്ള ചെയിനുകൾ, മുത്തുകൾ, അല്ലെങ്കിൽ തിളങ്ങുന്ന കല്ലുകൾ എന്നിവ ഉണ്ടാകാറുണ്ട്. ഷോർട്‌സ്, സ്കർട്ടുകൾ, അല്ലെങ്കിൽ ഗൗണുകൾ എന്നിവയ്‌ക്കൊപ്പം പാർട്ടികൾക്കോ ബീച്ച് യാത്രകൾക്കോ അതുമല്ലെങ്കിൽ സാധാരണ വസ്ത്രങ്ങൾക്കോ ഒപ്പം ഒരു ഗ്ലാമറസ് ലുക്ക് നൽകാൻ ഇത് ഉപയോഗിക്കുന്നു.

ലളിതമായ ഡിസൈനുകൾ മുതൽ സങ്കീർണ്ണമായവ വരെ ഇതിൽ ലഭ്യമാണ്. ധരിക്കാനുള്ള സൗകര്യത്തിനായി പലപ്പോഴും ഇതിൽ ഇലാസ്റ്റിക് ഉപയോഗിക്കാറുണ്ട്. കാലുകൾക്കും അരക്കെട്ടിനും പ്രത്യേക ഭംഗി നൽകാൻ ഇത്തരം ആഭരണങ്ങൾ സഹായിക്കുന്നു.