മഴക്കാലവും മലയാള സിനിമയും തമ്മിൽ വേർപെടുത്താനാകാത്ത ഒരു ആത്മബന്ധമുണ്ട്. പ്രണയം, വിരഹം, ഗൃഹാതുരത്വം തുടങ്ങിയ ആഴമേറിയ മനുഷ്യവികാരങ്ങളെ മഴയുടെ പശ്ചാത്തലവുമായി സമന്വയിപ്പിക്കുന്നതിൽ നമ്മുടെ സിനിമകൾ എപ്പോഴും മികച്ചുനിൽക്കുന്നു. ജനാലയിലൂടെ പുറത്തെ കാർമേഘങ്ങളെ നോക്കി, ഒരു കപ്പ് ചൂടുള്ള ചായയോ കാപ്പിയോ കുടിച്ച് മഴ ആസ്വദിക്കുന്നത് ഒട്ടും വിരസതയില്ലാത്ത ഒരു സുഖമുള്ള അനുഭവമാണ്.
മഴ കനക്കുമ്പോൾ, മനസ്സിന് കുളിർമയേകാൻ ചൂടുള്ള പലഹാരങ്ങൾക്കൊപ്പം നല്ല സംഗീതം കൂടിയുണ്ടെങ്കിൽ ആ അനുഭവം പൂർണമായി. ഈ മൺസൂൺ കാലത്ത് നിങ്ങളുടെ പ്ലേലിസ്റ്റിൽ തീർച്ചയായും ഉൾപ്പെടുത്താവുന്ന, മഴയുടെ ആത്മാവ് തൊട്ടറിഞ്ഞ അഞ്ച് മലയാള ഗാനങ്ങൾ പരിചയപ്പെടാം.
പ്രണയമണിത്തൂവൽ പൊഴിയും… (ചിത്രം: അഴകിയ രാവണൻ)
മഴയെ പ്രിയപ്പെട്ട ഓർമ്മകളിലേക്കും നഷ്ടപ്രണയത്തിലേക്കും വഴിനടത്തുന്ന ഒരു നൊസ്റ്റാൾജിക് ഗാനമാണിത്. വിദ്യാസാഗറിന്റെ മാന്ത്രിക സംഗീതത്തിൽ പിറന്ന ഈ ഗാനം റിലീസ് ചെയ്ത് വർഷങ്ങൾ കഴിഞ്ഞിട്ടും മലയാളികളുടെ മനസ്സിൽ മഴ പെയ്യുമ്പോൾ ആദ്യം ഓടിയെത്തുന്ന ഒന്നാണ്. ആഴത്തിലുള്ള പ്രണയം ഉണർത്തുന്ന ഒരു നിത്യഹരിത ഗാനമാണിതെന്ന് നിസ്സംശയം പറയാം.
എല്ലാ വരിയിലും മഴയെന്ന വാക്കുണ്ടെന്ന പ്രത്യേകതയുണ്ട് ഈ പാട്ടിന്. പ്രണയത്തിന്റെ ആഴത്തെയും വികാരങ്ങളെയും മഴയുടെ വിവിധ ഭാവങ്ങളുമായി ബന്ധപ്പെടുത്തിയാണ് ഈ പാട്ടിലെ വരികൾ. പ്രണയത്തിന്റെ മാധുര്യവും നൊമ്പരവും ഈ പാട്ടിലുണ്ട്.
സംഗീതം: വിദ്യാസാഗർ
വരികൾ: കൈതപ്രം ദാമോദരൻ നമ്പൂതിരി
ആലാപനം: സുജാത മോഹൻ
പവിഴ മഴ (ചിത്രം: അതിരൻ)
കാതുകളിൽ ഒരു മാന്ത്രിക അനുഭൂതി നിറയ്ക്കുന്ന ഈണമാണ് ‘അതിരൻ’ എന്ന ചിത്രത്തിലെ ‘പവിഴ മഴ’ എന്ന ഗാനത്തിന്റേത്. ചിത്രത്തിന്റെ ദുരൂഹതയും പ്രണയവും മഴയുടെ പശ്ചാത്തലത്തിൽ ഈ ഗാനം മനോഹരമായി ആവിഷ്കരിക്കുന്നു. നിഗൂഢതയും പ്രണയവും കലർന്ന ഒരു മാന്ത്രിക അന്തരീക്ഷം ഈ ഗാനം സമ്മാനിക്കുന്നു. അതിന് കൂട്ടായി പ്രകൃതിയേയും സാക്ഷിയായി മഴമേഘങ്ങളേയും വർണിക്കുന്ന വരികളാണ് ഗാനത്തിന്റേത്.
സംഗീതം: പി. എസ്. ജയ്ഹരി
വരികൾ: വിനായക് ശശികുമാർ
ആലാപനം: കെ. എസ്. ഹരിശങ്കർ
മഴത്തുള്ളികൾ പൊഴിഞ്ഞീടുമീ… (ചിത്രം: വെട്ടം)
മഴ നിങ്ങളിൽ പ്രണയത്തിന്റെ തീവ്രമായ വികാരങ്ങളും പ്രിയപ്പെട്ടവരിലേക്കുള്ള ഓർമ്മകളും ഉണർത്തുന്നുവെങ്കിൽ, ഈ ഗാനം നിങ്ങൾക്കുള്ളതാണ്. പ്രിയദർശൻ സംവിധാനം ചെയ്ത ‘വെട്ടം’ എന്ന ചിത്രത്തിലെ ഈ ഗാനം മലയാളികളുടെ എക്കാലത്തെയും പ്രിയപ്പെട്ട നിത്യഹരിത ക്ലാസിക്കുകളിൽ ഒന്നാണ്.
കേരളത്തിലെ മഴയുടെ ദൃശ്യാവിഷ്കാരവും ഇതിന്റെ പ്രത്യേകതയാണ്. നാടൻവഴി, മൺപാത… എന്നീ വിശേഷണങ്ങളിലൂടെ നാട്ടിന്പുറത്തെ കാഴ്ചകളിലേക്കും മനസ്സിൽ മായാതെ കിടക്കുന്ന പ്രണയത്തിന്റെ ഓർമകളിലേക്കും പാട്ട് നമ്മളെ കൂട്ടിക്കൊണ്ടുപോകുന്നു. പ്രണയവും ഗൃഹാതുരത്വവും കാത്തിരിപ്പും തുളുമ്പുന്ന, ഹൃദയസ്പർശിയായ ഒരു മെലഡി. എം. ജി. ശ്രീകുമാറിന്റെ ഭാവസാന്ദ്രമായ ആലാപനം ഈ ഗാനത്തെ കൂടുതൽ മനോഹരമാക്കുന്നു.
സംഗീതം: ബേണി ഇഗ്നേഷ്യസ്
വരികൾ: ബീയാർ പ്രസാദ്
ആലാപനം: എം. ജി. ശ്രീകുമാർ
മഴനീർത്തുള്ളികൾ (ചിത്രം: ബ്യൂട്ടിഫുൾ)
ശാന്തവും ഏകാന്തവുമായ ഒരു മൺസൂൺ സായാഹ്നത്തിന് ഏറ്റവും അനുയോജ്യമായ ഗാനമാണ് ‘ബ്യൂട്ടിഫുൾ’ എന്ന ചിത്രത്തിലെ ‘മഴനീർത്തുള്ളികൾ’ എന്ന ഗാനം. മഴത്തുള്ളികളെ കാമുകിയുടെ ശരീരത്തിലെ വിയർപ്പുതുള്ളികളോട് ഉപമിച്ചുകൊണ്ടാണ് ഗാനം ആരംഭിക്കുന്നത്. പ്രകൃതിയുടെ തണുപ്പും പ്രണയത്തിന്റെ ഊഷ്മളതയും തമ്മിലുള്ള മനോഹരമായ സംയോജനം ഈ പാട്ടിന്റെ വരികളിൽ കാണാം.
ആത്മാവിലേക്ക് ആഴ്ന്നിറങ്ങുന്ന, മനസ്സിന് ശാന്തതയേകുന്ന ഒരു മൺസൂൺ ട്രാക്ക്. മനസ്സിന് വല്ലാത്തൊരു ആശ്വാസം നൽകാൻ ഈ ട്രാക്കിന് സാധിക്കും.
സംഗീതം: രതീഷ് വേഗ
വരികൾ: അനൂപ് മേനോൻ
ആലാപനം: തുളസി യതീന്ദ്രൻ
മഴയേ തൂമഴയേ (ചിത്രം: പട്ടം പോലെ)
ചെറുചാറ്റൽ മഴയെയും നനുത്ത യുവപ്രണയത്തെയും പ്രതിഫലിപ്പിക്കുന്ന സൗമ്യവും മനോഹരവുമായ ഒരു ഗാനം. മഴയോട് കാതലിയെ കണ്ടോ എന്ന് കാമുകൻ ചോദിക്കുന്നതിലൂടെയാണ് പാട്ട് തുടങ്ങുന്നത്. കാത്തിരുന്ന കാമുകനെ മഴത്തുള്ളിയിൽ പ്രണയിനി കണ്ടുവെന്ന് പറയുന്നതിലാണ് വരികൾ അവസാനിക്കുന്നത്.
പ്രണയത്തെ വർണ്ണിക്കുന്ന ഈ ട്രാക്ക് മഴയുടെ യഥാർഥ ആത്മാവ് ഉൾക്കൊള്ളുന്നു. കാറ്റും കാർമേഘവും ഒത്തുചേരുന്ന ഒരു സായാഹ്നത്തിൽ കേൾക്കാൻ പറ്റിയ പാട്ട്.
സംഗീതം: എം. ജയചന്ദ്രൻ
വരികൾ: സന്തോഷ് വർമ്മ
ആലാപനം: ഹരിചരൺ, മൃദുല വാര്യർ
