ലിപ്സ്റ്റിക് ഇടുന്നവർ വേശ്യകളോ?

സൗന്ദര്യത്തിന്റെ വശ്യതയ്ക്ക് മാറ്റ് കൂട്ടുന്ന ഒന്നാണ് ലിപ്സ്റ്റിക് (Lipstick). പെൺകുട്ടികളുടെ ഹാൻഡ്ബാഗിൽ ഒഴിച്ചുകൂടാനാകാത്ത ഒന്നായി മാറി. പണ്ട് ചുവന്ന നിറത്തിൽ മാത്രമാണ് ലിപ്സ്റ്റിക് കൂടുതൽ കണ്ടിരുന്നത്. എന്നാൽ ഇന്ന് വിവിധ ഷേഡുകൾ ലഭ്യമാണ്. ആരാണ് ഈ ലിപ്സ്റ്റിക് കണ്ടുപിടിച്ചത്? എങ്ങനെയാണ് മേക്കപ്പിൽ ഒഴിച്ചുകൂടാനാകാത്ത ഒന്നായി മാറിയത്? ആ കഥ അറിയണമെങ്കിൽ അയ്യായിരം വർഷം പിന്നിലേക്ക് പോകണം.

സുമേറിയക്കാരാണ് ആദ്യമായി ലിപ്സ്റ്റിക് ഉപയോഗിച്ചതെന്നാണ് പറയപ്പെടുന്നത്. രത്നക്കല്ലിന്റെ പൊടി മുഖത്തും ചുണ്ടിലും കണ്ണിനു ചുറ്റും തേച്ചുപിടിപ്പിച്ചിരുന്നു. റെഡ് ഇന്ത്യൻ വിഭാഗത്തിലെ മായൻ സ്ത്രീകളും ലിപ്സ്റ്റിക് ഉപയോഗിച്ചിരുന്നതായി പതിമൂന്നാം നൂറ്റാണ്ടിലെ കൈയെഴുത്ത് പുസ്തകമായ ദ ഗ്രോലിയെർ കോഡെക്സി’ൽ പറയുന്നുണ്ട്

സാമൂഹ്യപദവി പ്രകടിപ്പിക്കാൻ പുരാതന ഈജിപ്റ്റുകാർ ലിപ്സ്റ്റിക് ഉപയോഗിച്ചിരുന്നു. ചില ആൽഗങ്ങളിൽ നിന്ന് ചുവന്നനിറം നൽകുന്ന വസ്തു വേർതിരിച്ചെടുത്തു. ക്ലിയോപാട്ര രാജ്ഞിയും ലിപ്സ്റ്റിക് ഉപയോഗിച്ചിട്ടുണ്ട്. സിന്ധൂനദീതട നാഗരികതയിലെ സ്ത്രീകൾ മുഖത്തും ചുണ്ടിലും ചുവപ്പുനിറം തേച്ചിരുന്നു.

ആന്തലൂഷ്യയിലാണ് ആദ്യമായി ഖരരൂപത്തിൽ സുഗന്ധം പൂശിയ കോലുകളായി ലിപ്സ്റ്റിക് പ്രത്യക്ഷപ്പെടുന്നത്. അബുൽ ഖാസിം അൽ സഹറാവിയാണ് ഇതു കണ്ടെത്തിയതെന്ന് പറയപ്പെടുന്നു. ഫിസിഷ്യനും സർജനുമായിരുന്ന അദ്ദേഹത്തെ മോഡേൺ സർജറിയുടെ പിതാവ് എന്നും വിളിക്കുന്നു.

പത്തൊൻപതാം നൂറ്റാണ്ടിൽ യൂറോപ്പിൽ ലിപ്സ്റ്റിക് ഒരു വിവാദ വിഷയമായി മാറി. ഒരു സ്ത്രീയുടെ രൂപത്തിൽ മാറ്റം വരുത്തുന്ന ഒന്നായിട്ടാണ് ലിപ്സ്റ്റിക്കിനെ കണ്ടത്. 1770-ൽ ഇംഗ്ലണ്ട് ലിപ്സ്റ്റിക്കിന് കടുത്ത ശിക്ഷകളും നിയന്ത്രണങ്ങളും ഏർപ്പെടുത്തി, സൗന്ദര്യവർധകവസ്തുക്കൾ ഉപയോഗിച്ച് പുരുഷന്മാരെ വിവാഹത്തിലേക്ക് വശീകരിക്കുന്നുവെന്നതാണ് കാരണം. കുറ്റം തെളിയിക്കപ്പെട്ട സ്ത്രീകളെ മന്ത്രവാദക്കുറ്റം ചുമത്തി വിചാരണ ചെയ്യാമെന്ന് ഒരു നിയമം അനുശാസിച്ചു. ലിപ്സ്റ്റിക്കുകൾ പിന്നോക്കാവസ്ഥയുടേയും പാർശ്വവൽകൃതരുടേയും അടയാളമായി മാറി. തെരുവ് വേശ്യകൾ, അഭിനേത്രിമാർ തുടങ്ങിയവരേ അത് ഉപയോഗിക്കൂ എന്ന സ്ഥിതിയായി. ചുവന്ന നിറം ഹിറ്റ്ലറിന് ഇഷ്ടമല്ലാത്തതുകൊണ്ട് തന്നെ, 1940-ൽ അഡോൾഫ് ഹിറ്റ്ലറും ജർമനി സന്ദർശിക്കുന്ന സ്ത്രീകൾ ലിപ്സ്റ്റിക് ധരിക്കരുതെന്ന് നിർദേശം നൽകി. അക്കാലത്തെ മതവിശ്വാസങ്ങളും ലിപ്സ്റ്റിക്കുകളുടെയോ ഏതെങ്കിലും മേക്കപ്പിന്റെയോ ഉപയോഗത്തെ വിലക്കി. ചുവന്ന ചുണ്ടുകൾ സാത്താൻ ആരാധനയുമായി ബന്ധപ്പെട്ടതാണെന്നും ലിപ്സ്റ്റിക് ഉപയോഗിക്കുന്ന സ്ത്രീകൾ മന്ത്രവാദികളാണെന്നും സംശയിച്ചു.

എലിസബത്ത് രാജ്ഞിയുടെ കാലത്ത് ലിപ്സ്റ്റിക് സർവാധിപത്യം കൊണ്ടു. രാജ്ഞിയുടെ പ്രിയപ്പെട്ട ബാൻഡ് ആയിരുന്നു ക്ലാരിൻസ്. 1952ൽ കിരീടധാരണ ചടങ്ങ് സമയത്ത് രാജ്ഞിക്ക് മാത്രമായി ഇവർ ‘ദ് ബാൽമോറൽ’ എന്ന ഷേഡ് പുറത്തിറക്കി. ചടങ്ങിൽ രാജ്ഞി ധരിച്ച വസ്ത്രത്തിന് ഇണങ്ങുന്ന ഷേഡ് ആയിരുന്നു. ചടങ്ങ് കഴിഞ്ഞപ്പോഴേക്കും ലിപ്സ്റ്റിക് ലോക ശ്രദ്ധ നേടുകയും ചെയ്തു. തേനീച്ചക്കൂടുകളിലെ മെഴുക് പ്രധാനഘടകമാക്കി നിർമിച്ചതായിരുന്നു. ചടങ്ങിലെ രാജ്ഞിയുടെ ചിത്രം പുറത്തുവന്നതോടെ ലിപ്സ്റ്റിക്കും പഴയ പ്രൗഢി തിരിച്ചുപിടിച്ചു. പിന്നീട് സൗന്ദര്യത്തിന്റെയും യൗവനത്തിന്റെയും അടയാളമായി ലിപ്സ്റ്റിക് മാറുകയായിരുന്നു.

1800കളുടെ അവസാനത്തോടെയാണ് ലിപ്സ്റ്റിക്കിന് ആധുനിക പരിണാമം ഉണ്ടാകുന്നത്. ഫ്രഞ്ച് പെർഫ്യൂം കമ്പനിയായ ഗുർലെയ്നാണ് ആദ്യമായി വാണിജ്യപരമായി ലിപ്സ്റ്റിക് നിർമിക്കുന്നത്. 1920കളോടെ ലിപ്സ്റ്റിക് ഒരു ഫാഷൻ അവിഭാജ്യ ഘടകമായി മാറി. 1923ൽ ജെയിംസ് ബ്രൂസ് മേസൺ ജൂനിയർ ഇന്നുകാണുന്ന ട്യൂബിലാക്കിയ ലിപ്സ്റ്റിക് പുറത്തിറക്കി. 1950കളിൽ മർലിൻ മൺറോ, എലിസബത്ത് ടെയ്‌ലർ തുടങ്ങിയ ഹോളിവുഡ് താരറാണിമാർ ലിപ്സ്റ്റിക്കിൽ തരംഗം സൃഷ്ടിച്ചു. ഇവരാണ് ചുവന്ന ചുണ്ടുകളെ അന്ന് വൈറലാക്കിയത്.

കാലം കടന്നു…ലിപ്സ്റ്റിക്കുകളിൽ വലിയ പരിവർത്തനം നടന്നു. നിറവും മണവും രൂപവും മാറി. ന്യൂഡ്, ഗ്ലോസി, ഡാർക്, ന്യൂട്രൽ എന്നിങ്ങനെ പലതരം ലിപ്സ്റ്റിക്കുകൾ വന്നു. ഇരുണ്ട നിറത്തിലുള്ളവർക്കും വെളുത്തവർക്കും അനുയോജ്യമായ ഷേഡുകൾ ബ്രാൻഡുകൾ അവതരിപ്പിക്കാൻ തുടങ്ങി. ഇതുവഴി എല്ലാവർക്കും തങ്ങൾക്ക് ചേർന്ന ലിപ്സ്റ്റിക് കണ്ടെത്താൻ കഴിഞ്ഞു. കടും തവിട്ടു നിറം, കടും ബെറി നിറം, ഇഷ്ടിക ചുവപ്പ് എന്നിവ ഇടത്തരം മുതൽ ഇരുണ്ട നിറമുള്ളവർക്ക് അനുയോജ്യമായവയാണ്. അതേസമയം കോറൽ പിങ്കും സോഫ്റ്റ് പിങ്കും വെറുത്ത ചർമത്തിന് യോജിക്കുന്നവയാണ്.