ആർ യു എ ഫെമിനിസ്റ്റ്? | Conversations- Part 1

“താനൊരു ഫെമിനിസ്റ്റ് ആണോ?”

ചോദ്യം ഒരു ആൺ സുഹൃത്തിനോടാണ്. മുഖഭാവമൊക്കെ ആകെയൊന്ന് മാറി.

“അല്ല!“

എന്ന് അയാൾ തറപ്പിച്ചു പറഞ്ഞു. സ്ത്രീകളുടെ അവകാശങ്ങളെക്കുറിച്ചും പുരുഷന്മാർ നേരിടുന്ന വിവേചനങ്ങളെക്കുറിച്ചും സമത്വത്തെക്കുറിച്ചുമൊക്കെ വാതോരാതെ സംസാരിക്കുന്നയാളാണ്. എന്നാൽ, ഈ ഒരു ചോദ്യത്തിനു മുന്നിൽ ഇതായിരുന്നു… ദേഷ്യവും വെറുപ്പുമായിരുന്നു ആറ്റിറ്റ്യൂഡ്.

“അതെന്തേ? എന്തുകൊണ്ടാ താൻ ഫെമിനിസ്റ്റ് അല്ലാത്തെ?“

“ഞാനോ!? ഫെമിനിസ്റ്റോ? എനിക്കത് ഇഷ്ടമല്ല.“

“ആട്ടേ… ഫെമിനിസം എന്നാൽ എന്താണെന്നാ തന്റെ മനസ്സിൽ?“

ചോദ്യത്തിനു മറുപടി അത്യാവശ്യം നല്ല വെറുപ്പ് പ്രകടമാക്കി വേഗത്തിൽ ലഭിച്ചു.

“സ്ത്രീകൾക്കൊരു ധാരണയുണ്ട്… അല്ലേൽ വേണ്ട… പുരുഷന്മാരുടെ മേൽ കുതിര കേറുക, പുരുഷന്മാരെ ഒന്നുമല്ലാതാക്കി അവരുള്ള സ്ഥാനങ്ങളിലൊക്കെ എത്തണമെന്ന വാശി, കുടിച്ചും വലിച്ചും നടക്കുക, ഞങ്ങളെ വെറുക്കുക… ഇതൊക്കെയല്ലേ ഈ ഫെമിനിസം! ഭയങ്കര ടോക്സികാണ്.“

“അയ്യടാ! അപ്പം അതാണ് സം​ഗതി. ഫെമിനിസം എന്നാൽ എന്താണെന്നുള്ള അടിസ്ഥാന ധാരണയില്ല. തെറ്റിദ്ധാരണ മാത്രേ ഉള്ളു.

എടോ, ഫെമിനിസം എന്നാൽ സ്ത്രീകളുടെ പുരുഷ വിരോധമല്ല കേട്ടോ. ഫെമിനിസം എന്നാൽ, സിംപിളായി പറഞ്ഞാൽ സ്ത്രീയ്ക്കും പുരുഷനും… അല്ല എല്ലാ ജെൻഡറിൽപ്പെട്ടവർക്കും തുല്യ നീതിയും അവകാശങ്ങളും എന്ന ആശയമാണ്. താൻ ഒരുപക്ഷേ ഫെമിനിസം എന്ന് മനസ്സിലാക്കിയിട്ടുള്ളതത്രയും കപട ഫെമിനിസം അഥവ സ്യൂഡോ ഫെമിനിസ്റ്റ് പ്രവൃത്തികളും ആശയങ്ങളും കണ്ടായിരിക്കാം.”

“സ്യൂ‍ഡോ ഫെമിനിസമോ?“

“അതെ, ഫെമിനിസം പോലെ നടിക്കുന്ന, പക്ഷേ ലക്ഷ്യം സമത്വമല്ലാത്ത ചില കാര്യങ്ങളാണത്.“

“താൻ പോടോ, പുതിയ ഓരോന്ന് കണ്ടുപിടിച്ചോണ്ട് വന്നോളും എല്ലാത്തിനെയും ന്യായീകരിക്കാൻ.“

“അല്ലെഡോ, ഇത് അത്ര പുതിയ ആശയമൊന്നുമല്ല. ഫെമിനിസം ഉള്ളിടത്തെല്ലാം ഈ കപട ആശയങ്ങൾ തെറ്റിദ്ധാരണയുണ്ടാക്കാറുണ്ട്. അത് തുല്യതയിൽ ഊന്നിയുള്ളതല്ല, മറിച്ച് വെറുപ്പും വിദ്വേഷവും മേൽകോയ്മയും ലക്ഷ്യമിട്ടുള്ളതാണ്. ആ ചിന്താഗതിയിൽ ഫെമിനിസം പുരുഷന്മാർക്കുള്ളതല്ല, സ്ത്രീകൾ മാത്രമുള്ള വൻ പോരാട്ടമാണ്. അത് മുന്നേ പറഞ്ഞപോലെ ടോക്സിക് ആണ്.

ഒരു സ്ത്രീയ്ക്ക് പുരുഷന്മാരെ ഉൾക്കൊള്ളാൻ സാധിക്കുമോ ആഗ്രഹിക്കുന്നുണ്ടോ എന്നതെല്ലാം വ്യക്തി താൽപര്യമാണ്, അവകാശവമുണ്ട്. എന്നാൽ, അതിനെ മഹത്തരമായൊരു സാമൂഹിക ആശയത്തിനുള്ളിൽ തെറ്റായി എടുത്തുവയ്ക്കുന്നതും പ്രചരിപ്പിച്ച് ന്യായീകരിക്കുന്നതും മോശമാണ്. ലിംഗ അസമത്വം തിരുത്തുന്നതിനുള്ള ഒരു അനിവാര്യമായ നടപടിയായി ഫെമിനിസത്തിനു പകരം സ്യൂഡോഫെമിനിസത്തെ പലരും കണക്കാക്കുന്നതുകൊണ്ടാണിത്. ഇതിനെക്കുറിച്ച് കൂടുതൽ പറഞ്ഞു വരുമ്പോൾ തനിക്ക് വ്യക്തമാകും. പറയട്ടേ?“

“ആം… കേൾക്കാം. പറയൂ…“

“ഇക്വാളിറ്റി ആൻഡ് ഇക്വിറ്റി… അതായത് തുല്യതയും സമത്വവും. ഇതാണ് ഫെമിനിസത്തിന്റെ അടിസ്ഥാന തത്വം. ജെൻഡർ ഇതിൽ സെക്കൻഡറിയാടോ. എല്ലാവർക്കും ഒരേ ജീവിത സാഹചര്യങ്ങൾ നൽകിയാൽ അവരെല്ലാവരും ഒരേ തലത്തിലുള്ള ജീവിതം നയിക്കാൻ പ്രാപ്തരാണെങ്കിൽ അവിടെ തുല്യത നടപ്പാക്കിയാൽ മതി. എന്നാൽ, അത്തരമൊരു സാഹചര്യമില്ല, പലർക്കും പലതു നൽകി നിലവിലെ സാഹചര്യങ്ങൾ പാകപ്പെടുത്തിയെടുത്തതിനു ശേഷം മാത്രമേ തുല്യതയെന്ന ആശയത്തിന് തുടക്കമിടാൻ ആകൂ എങ്കിൽ അവിടെ ആദ്യം നടപ്പാക്കേണ്ടത് സമത്വമാണ്. ഇതു രണ്ടു നടപ്പാക്കേണ്ട സമൂഹമാണ് നമ്മുടേത്.

ഏതെങ്കിലും സാഹചര്യത്തിൽ സ്ത്രീകൾക്കു മുൻഗണനയോ പരിഗണനയോ കൂടുതൽ നൽകുന്നതായി തോന്നിയിട്ടുണ്ടെങ്കിൽ അതിതുകൊണ്ടാണ്. പേട്രിയാർക്കിയുടെ നാളുകളായുള്ള ശീലങ്ങളിലും അടിച്ചമർത്തപ്പെട്ടതോ അപലയാണെന്നോ ചിത്രീകരിക്കപ്പെട്ടതായുള്ള കാഴ്ചപ്പാടുകളിൽനിന്നും വിശ്വാസത്തിൽനിന്നും സ്ത്രീകളെ ആദ്യം പുറത്തുകൊണ്ടുവന്നതിനു ശേഷം മാത്രമേ ആശയം നടപ്പാകൂ. ഇത് മനുഷ്യന്റെ ബേസിക് അവകാശത്തിന്റെ ഭാഗമല്ലേ, ഒന്ന് ആലോചിച്ച് നോക്കൂ. ഇവിടെ സ്ത്രീകൾ എന്ന് പറയുമ്പോഴും താരതമ്യേന മൈനോറിറ്റിയായ ട്രാൻസ്ജെൻഡേഴ്സും ഇന്ന് ഉൾപ്പെടുന്നുണ്ട്.“

“മ്മ്… എന്നിട്ട്?“

“ഫെമിനിസത്തിനും സ്യൂ‍ഡോ ഫെമിനിസത്തിനുമിടയിൽ വ്യക്തമായ വേർതിരിവ് ഇല്ലാത്തതിനാൽ, പതിറ്റാണ്ടുകളുടെ പുരോഗതിയെ ഇല്ലാതാക്കുന്ന തരത്തിൽ സ്ത്രീകളല്ലാത്ത ലിംഗഭേദങ്ങളെ അടിച്ചമർത്തുന്നതിനെ പിന്തുണയ്ക്കുന്ന ഒരു പ്രസ്ഥാനമായി ഫെമിനിസം മാറുന്നതായാണ് കാണുന്നത്. ഫെമിനിസത്തിന്റെ ചരിത്രമല്ല ഇവിടെ പറയുന്നത്, മറിച്ച് പതിറ്റാണ്ടുകളുടെ പോരാട്ടത്തിൽനിന്നു മനുഷ്യൻ മനസ്സിലാകാതെ പോയിട്ടുള്ള ചില കാര്യങ്ങൾ മാത്രം. എന്നിരുന്നാലും അറിയേണ്ട ഒരു കാര്യമുണ്ട്. പത്തൊൻപതാം നൂറ്റാണ്ടിന്റെ പകുതിയൊക്കെ ആയപ്പോഴേക്കും സ്ത്രീകൾക്ക് തുല്യ അവസരങ്ങൾ സൃഷ്ടിക്കുന്നതിലും അവർ നേരിടുന്ന പ്രശ്നങ്ങളിലും ശ്രദ്ധ കേന്ദ്രീകരിച്ച് ആരംഭിച്ചതാണ് ഫെമിനിസം. ആശയം വളരുമല്ലോ! അങ്ങനെയാണത് എല്ലാ ലിംഗക്കാരുടെയും എല്ലാ അസമത്വങ്ങളെയും അസമത്വങ്ങളെയും പരിഗണിക്കുന്ന തലത്തിലെത്തി നിൽക്കുന്നത്.“

“അപ്പോ… സ്ത്രീകൾക്ക് ചിലപ്പോൾ കിട്ടുന്ന എക്സ്ട്രാ സപ്പോർട്ട് അഥവ പ്രിവിലേജുകളോ?“

“അത് സ്ഥിരമായിട്ടുള്ള പ്രത്യേകാവകാശമല്ല. ഇറ്റ് ഈസ് എ കറക്ഷൻ. നേരത്തെ സൂചിപ്പിച്ച ഇക്വിറ്റിയുടെ ഭാഗമാണ്. അത് ഫീമെയിൽ സുപ്രീമസിയിലേക്ക് നയിക്കുന്നതല്ല, സമൂഹത്തിൽ മറ്റു ജൻഡറുകളുമായി തുല്യതയിലേക്കുള്ള മാർഗമാണ്, അതിനായി പ്രാപ്തമാകാനുള്ള സ്വാതന്ത്ര്യവും ശ്രമങ്ങളുമാണ്. ഭയക്കേണ്ടതില്ല. ഇത് നടപ്പാക്കുന്ന ഏതെങ്കിലും കാര്യങ്ങളിൽ എതിർ ജെൻഡറിന്റെ ഈഗോ ആണ് നോവുന്നതെങ്കിൽ പാർട്ട് ആൻഡ് പാഴ്സൽ ഓഫ് ദി ഗെയിം ആണ്. മാറ്റം ഉൾക്കൊള്ളാനുള്ള സമയം നൽകാം. പക്ഷേ, മറ്റെന്തെങ്കിലുമാണ് പ്രശ്നമെങ്കിൽ, അതിനെ ഫെമിനിസമെന്ന ആശയത്തിന്റെ പേരിൽ കണ്ണടച്ചു വെറുതെ വിടേണ്ടതില്ല. ഇതേ ആശയം തന്നെ ചൂണ്ടിക്കാട്ടി എതിർ ജെൻഡറിലുള്ളയാൾക്ക് ചോദ്യം ചെയ്യാവുന്നതാണ്.“

“ഓ, അതേല്ലേ! ഈ വളർച്ചയെക്കുറിച്ച് ആളുകളിലേക്കെത്തിയിട്ടില്ലെന്നു തോന്നുന്നു. അല്ലെങ്കിൽ തെറ്റിദ്ധരിക്കപ്പെടുന്നുണ്ട്. അതാണ്! ഇപ്പോൾ മനസ്സിലാകുന്നു. അപ്പോൾ ഞാനും ഒരു ഫെമിന്സ്റ്റ് ആണല്ലോ! കാര്യം മനസിലായപ്പോൾ അതു തുറന്നു പറയുന്നതിൽ എനിക്കിപ്പോൾ ഒരു അവജ്ഞയും തോന്നുന്നില്ല.“

“അതാണ്! കണ്ടോ എത്ര സിംപിളാണെന്ന്!“